"Razılaşma 22:00-da bitir, qalan terrorçular öldürüləcək"

Rəsmi Ankara ilə Vaşinqtonun əldə etdiyi razılaşmaya əsasən, YPG terror qruplaşmasının üzvlərinin sərhəd təhlükəsizlik zonasını tərk etmələri üçün verilmiş 120 saatlıq vaxt bu gün Türkiyə vaxtilə saat 22:00-da bitir.


Femida.az-ın “haberler.com”a istinadən verdiyi xəbərə görə, bu məqamda təhlükəsizlik orqanları bəyanat yayıblar. Bildirilib ki,anlaşma 17 oktyabr saat 22:00-da qüvvəyə minib və əlavə vaxt verilməyəcək.

“Konkret şəkildə ifadə etdik. Saat 22:00-da bu iş bitəcək. Əgər hələ terrorçular qalıbsa, məhv ediləcəklər”, - deyə məlumatda vurğulanıb.

Həmçinin qeyd olunub ki, indiyə qədər 125 avtomobil Suriyanın şimalından çıxarılıb. Lakin nə qədər terrorçunun təhlükəsizlik zonasını tərk etdiyi ilə bağlı dəqiq rəqəm yoxdur.

“Bütün bölgədə 440 kilometrlik ərazidə 10-15 min terrorçunun olduğu təxmin edilir. Bu gün saat 22:00 etibarilə Tel Əbyad-Rəsulayn xəttinin, yəni 120 kilometrlik ərazinin təhlükəsiz zona halına gətirilməsi üçün işlərə başlanılacaq. Hədəf 440 kilometrlik bölgədir”, -deyə bəyanatda ifadə olunub.

Xatırladaq ki, Türkiyə Silahlı Qüvvələrinin 9-17 oktyabr tarixlərində Suriyanın şimalında apardığı “Sülh Çeşməsi hərəkatı” çərçivəsində 775 terrorçu zərərsizləşdirilib. Türkiyə ordusu 7, Suriya Milli Ordusu 79 şəhid verib. Daha 20 türkiyəli mülki vətəndaş bir neçə şəhərə hava hücumu nəticəsində şəhid olub.